Blej Shqip edhe në Maqedoni!

[Arbëri]

[Arbëri]

[Arbëri]

Rreth 200 mijë euro shkojnë në Shqipëri

Komunat shqiptare të Maqedonisë, ndjekin me shumë vëmendje situatën e krijuar në Shkodër dhe për këtë secila prej tyre ka siguruar ndihma brenda mundësive dhe kushteve. Ndihmat që janë ndarë për banorët e rajoneve të përmbytura në Shqipëri, shënojnë numër të konsiderueshëm të hollash dhe mjete financiare. Komuna e Tetovës, për banorët e Shkodrës ka ndarë tridhjetë mijë euro. Ndërsa, njëzet mijë euro janë siguruar nga voluntarizmi i qytetarëve të komunës së Tetovës, biznesmenë, afaristë të ndryshëm. Kontingjenti i parë për Shkodër është nisur të mërkurën, thanë nga komuna e Tetovës. Nga komuna e Gostivarit, edhe përkundër mjeteve të grumbulluara me vlerë prej dhjetëmijë euro, transferimi do të bëhet pas përfundimit të disa procedurave. "Ndihmat e siguruara nga komuna Gostivarit për banorët e rajoneve të përmbytura, për shkak të procedurës së dokumentacionit akoma nuk ka filluar transferimi. Kjo shifër, duhet të dalë para këshillit, pastaj pasi të sillet vendimi do të bëhet transferimi", tha Sadri Elezi, nga komuna e Gostivarit. Edhe Kryqi i Kuq i Maqedonisë shpreh gatishmërinë për të ndihmuar me ndihma logjistike por edhe ndihma ushqimore. Sipas përfaqësuesit të kësaj shoqate, Sait Saiti, Kryqi i Kuq ofron atë që është nevojë e momentit si, pako higjienike, ushqim etj.

Kontingjenti i parë i shoqatës humanitare "El Hilal", një kamion me ushqim të kafshëve veçmë ka arritur në Shkodër. Ndërsa të dielën pritet që të arrijnë edhe tre kamionë tjerë. "Një kamion me ushqim për kafshët si dhe shpenzimet e rrugës janë nga komuna e Studeniçanit, kamioni i dytë me veshmbathje të reja dhe mjete higjienike, vjen nga Kumanova dhe dega e Çairit, ndërsa kamioni i tretë miell nga Kërçova. Kurse, degët e shoqatës "El Hilal" në Dibër, Tetovë, Kërçovë janë në përfundim e sipër për mbledhjen e ndihmave për banorët e Shkodrës", tha Behexhudin Shehapi, kryetar i "El Hilalit". Komuna e Zhelinës, pret që pas rregullimit të disa problemeve administrative do të jetë e gatshme për të ndihmuar shqiptarët e Shkodrës që pësuan nga përmbytjet. Oda Ekonomike e Maqedonisë Veriperëndimore (OEMVP), së shpejti pret që të publikojë në media përgatitjet për ndihmat që u dedikohen banorëve të Shkodrës. Përgatitjet janë në proces e sipër. Nga Oda Ekonomike e Maqedonisë Veriperëndimore do të sigurohen mjete materiale, ushqim dhe veshmbathje. Ndihma ka dërguar edhe Qeveria e Maqedonisë, duke dërguar gomone, pompa për largimin e ujit si dhe një ekuipazh prej rreth 45 personave të cilët do të ndihmojnë territoret e vërshuara.

Vërshimet në Shqipëri kishin filluar rreth dy javë më parë kur ujërat e lumenjve Drini i Zi, Buna, Vjosa kishin dalë nga shtretërit dhe kishin vërshuar vendbanimet në qytetin e Shkodrës dhe kryesisht fshatrat e qytezat në Malësinë e Madhe. Dëmet planifikohen se kanë arritur rreth 66 milionë euro, të cilat nuk mund të sanohen me vite të tëra. Në territoret e përmbysura kanë ndihmuar edhe Kosova me 200 mijë euro dhe me Forcat e Sigurisë së Kosovës, kurse në ndihmë janë vënë edhe forcat e NATO-s dhe shtete të tjera evropiane.